祖記讓主「馬」到功成
 
歐聯A組賽事，祖雲達斯主場對馬德里體育會充滿變數，但係為咗力爭小組第1名，斑馬兵團已經將目標訂為淨勝兩球，既然佢哋咁有部署同決心，一於連讓球盤都唔買，直接買4.5倍「讓主」。（周二2，有線64及203台周三3:45am直播）

先拆解下A組形勢，馬德里體育會12分排第1篤定出線，祖雲達斯9分排第2，其實祖記今晚和波都可以鎖定次名晉級，但若然輸咗，而另一邊奧林比亞高斯擊敗馬模，就會出現奧、祖兩軍同分，奧林比亞高斯可憑較佳對賽成績搶番小組第2名，相信祖雲達斯都唔希望見到咁嘅意外發生，所以派路同埋隊長保方已經開晒聲，叫其他隊友唔止要努力爭勝，仲要爭取淨勝馬德里體育會兩球，用較佳對賽成績反壓對手成為小組第1名，以求喺16強避開較強隊伍，有鬥心又有部署，志氣仲咁高，絕對值得球迷捧場啦！

馬體會中後場唔齊腳

雖然列治史迪拿停賽，卡華禾艾沙姆又因接受手術而倦勤，不過祖記仲有保羅普巴、泰維斯、洛蘭迪，同埋艾華路莫拉達等好波之人，喺迪爾艾比主場出擊，4.5倍「讓主」贏晒都唔奇吖！
馬德里體育會上場西甲以2:0擊敗艾爾切，捷西斯加美斯同埋文迪蘇傑分別入波，但係今次出征意大利有安沙迪同埋中堅祖奧米蘭達繼續倦勤，而阿利斯奧施斯因為未融入球隊，始終未獲施蒙尼重用，睇嚟馬體會都難阻祖記開「讓主」。